An Cód Iompair
Ráiteas Scoile
Is scoil lán-Ghaeilge í Gaelscoil Inse Chór ina múintear gach ábhar, seachas an Béarla, trí mheán na Gaeilge. Is í an Gaeilge teanga na scoile agus cuirtear béim ar leith ar ár gcultúr traidisiúnta.
Is scoil Chaitliceach Rómhánach í Gaelscoil Inse Chór, faoi phátrúnacht Ardeaspag Bhaile Átha Cliath. Fáiltítear roimh pháistí ó chúlraí cultúrtha eile freisin.
Is é aidhm na scoile timpeallacht foghlama dhearfach a chruthú a chuireann ar chumas gach linbh aonair forbairt go morálta, go spioradálta, go fisiciúil, go acadúil agus go cultúrtha. Cuidíonn an Cód Iompair leis an aidhm sin a thacú.
Tá an Cód Iompair riachtanach freisin chun sábháilteacht na bpáistí, na foirne agus phobal na scoile a chinntiú. Tá súil ag an nGaelscoil le comhoibriú gach duine chun an Cód a chur i bhfeidhm.
Gaeilge
Is í an Gaeilge teanga labhartha na scoile. Táthar ag súil go labhróidh daltaí an Gaeilge laistigh den scoil i gcónaí agus ag aon imeachtaí seachtracha a bhaineann leis an scoil. Tá sé tábhachtach tú féin a chur ar an eolas faoi lárnacht agus thábhacht na Gaeilge i saol laethúil na scoile agus ag pointe iontrála. Tá eolas faoi na modhanna a úsáidimid chun úsáid na Gaeilge a chur chun cinn trí luaíochtaí agus smachtbhannaí le fáil sa pholasaí seo.
Poncúlacht agus tinreamh
Tosaíonn an scoil ag 8.50 gach maidin agus táthar ag súil go mbeidh gach páiste ina sheasamh i gclós na scoile (nó sa halla ar laethanta fliucha) ina líne ranga ag an am sin. I gcás aon pháiste atá ar thalamh na scoile roimh 8.50 r.n., tá a dtuismitheoir/feighlí freagrach as a gcúram go dtí an t-am sin.
Críochnaíonn an gnáthlá scoile ag 1.30 i.n. do naíonáin, do rang sóisearach agus do rang sinsearach, agus ag 2.30 i.n. do Ranganna 1 – 6. I gcás páistí a thagann ar scoil go déanach nó a fhágann go luath, iarrtar ar a dtuismitheoir/caomhnóir an leabhar tinrimh atá lasmuigh d’oifig na scoile a shíniú. Arís, tá tuismitheoirí/feighlithe freagrach as cúram a bpáistí óna n-am críochnaithe scoile.
Táthar ag súil go mbeidh gach páiste i láthair go rialta ar scoil.
Nuair a bhíonn páiste as láthair ón scoil, táthar ag súil le litir mhínithe ar a gcéad lá ar ais ar scoil.
Tá sé de dhualgas ar an scoil an Bord Náisiúnta Leasa Oideachais a chur ar an eolas faoi aon leanbh a bhíonn as láthair ar feadh 20 lá scoile i mbliain scoile amháin.
Sábháilteacht Ghinearálta
Táthar ag súil le dea-iompar ó gach pháiste i gcónaí; agus táthar ag súil go mbeidh siad béasach agus cineálta lena chéile agus le daoine fásta.
Ní ghlacann Gaelscoil Inse Chór le bulaíocht d’aon chineál agus leantar Polasaí Bí Cineálta na scoile i ngach cás líomhnaithe. Tá cóipeanna den pholasaí seo ar fáil ó oifig na scoile.
Ní cheadaítear bréagáin a thabhairt ar scoil ach amháin le cead an mhúinteora ranga.
Ní cheadaítear do leanaí fóin chliste a thabhairt ar scoil faoi aon imthosca. Más gá fón a úsáid, féadfar fón póca a cheadú. Caithfear cead a lorg ón múinteoir ranga agus míniú a thabhairt.
Ní cheadaítear do leanaí ríomhairí a úsáid gan mhaoirseacht múinteora.
Siúlann gach duine taobh istigh d’fhoirgneamh na scoile i gcónaí ach amháin le linn ranganna corpoideachais.
Ar laethanta fliucha, nuair a théann na páistí díreach chuig halla na scoile, iarrtar ar thuismitheoirí agus ar chaomhnóirí imeacht nuair a shroicheann an Príomhoide an halla.
Siúlann gach leanbh faoi mhaoirseacht múinteora chuig na busanna scoile nó chuig na pointí bailithe os comhair na scoile nuair a bhíonn sé in am dul abhaile.
Iarrtar ar thuismitheoirí/chaomhnóirí foirm a líonadh isteach, chun an duine/na daoine a bhailíonn a bpáiste/páistí ón scoil a ainmniú.
Má aontaíonn tuismitheoirí/caomhnóirí gur féidir le leanbh dul abhaile gan mhaoirseacht ó dhuine fásta, ba chóir an scoil a chur ar an eolas faoi seo i scríbhinn.Sábháilteacht sa Chlós Scoile
Ar mhaithe le sábháilteacht, ní cheadaítear do pháistí i naíonáin bheaga agus i naíonáin mhóra imirt ach ar an gclós tarmac.
Ní mór do gach páiste fanacht laistigh de radharc mhaoirseoirí na clóis scoile. Dá bhrí sin, tá cosc iomlán ar pháistí dul taobh thiar de na crainn nó taobh thiar de na seomraí réamhdhéanta.
Ní mór do pháistí cead a iarraidh ar mhaoirseoir clóis chun dul go dtí an leithreas, atá sa Seomra Ealaíne.
Ní mór do pháistí dul chuig maoirseoir clóis i gcás aon deacrachta nó fadhbanna, nó aon ghortú nó breoiteachta. Ní cheadaítear d’aon pháiste dul isteach i bhfoirgneamh na scoile le linn amanna sos gan chead.
Seoltar aon pháiste a dhéanann drochiompar sa chlós chuig an ‘balla smaoinimh’ nó ‘balla machnaimh’, chun smaoineamh ar a n-iompar.
Bualtar an clog trí huaire chun a fhógairt do pháistí go bhfuil sé in am dul chuig a línte ranga:
An chéad chlog: STOP: Stopann gach páiste ag imirt láithreach.
An dara clog: SIÚL/WALK: Siúlann gach páiste go dtí an líne ranga.
An tríú clog: SEAS/STAND: Seasann gach páiste go ciúin sa líne ranga.
Ní cheadaítear liathróidí peile ar chlós na scoile idir 8:40 r.n. agus 8:50 r.n.
Éide Scoile
Seo a leanas an éide scoile, agus caithfidh gach páiste ceann amháin den dá rogha seo a chaitheamh ar scoil gach lá:
Bríste/sciorta/pínafóir liath, geansaí cabhlaigh, léine ghorm/cabhlaigh nó léine polo ghorm/cabhlaigh.
Culaith spóirt na Gaelscoile, agus léine polo ghorm/cabhlaigh.
Ar laethanta Corpoideachas, ní mór an culaith spóirt agus na bróga reatha a chaitheamh.
Ní cheadaítear bróga le rothaí ná sála arda ar scoil.
Ní cheadaítear smideadh a chaitheamh ar scoil.
Caithfidh gruaig gach phaiste a bheith néata ar scoil.
Ar mhaithe le sábháilteacht, ní cheadaítear aon seodra ar scoil ach amháin cluasáin agus uaireadóirí láimhe.
Ar mhaithe le sábháilteacht, ní cheadaítear tairní aicrileach ar scoil.
Gruaig
Caithfidh páistí a bhfuil gruaig fhada orthu a gcuid gruaige a cheangal siar. Tá sé seo chun cosc a chur ar tharchur míolta cinn. Iarraimid ar thuismitheoirí na céimeanna seo a leanas a leanúint.
Má bhraitheann tú míolta cinn i ngruaig do linbh, tabhair aghaidh ar an gceist láithreach agus cuir an scoil ar an eolas mar bheart práinne.
Má fhaigheann tú téacs ón scoil ag cur in iúl duit go bhfuil míolta cinn i láthair i rang do linbh, déan cúram cuí de ghruaig do linbh.
Ba chóir go mbeadh stíl gruaige néata ag na páistí agus níor chóir dóibh stíleanna gruaige ná dathanna gruaige a chaitheamh a tharraingíonn aird mhíchuí orthu.
Bia agus Deoch
Caithfidh gach páiste cloí le Polasaí Lóin Shláintiúil na scoile, agus ní mór do gach tuismitheoir/caomhnóir cóip de a shíniú.
Bainfear bia/deoch d’aon pháiste nach leanann an Polasaí Lóin.
Ní cheadaítear bia ná deoch sa chlós scoile.
Ní cheadaítear guma coganta ar scoil.
Is crios saor ó chnónna í Gaelscoil Inse Chór.
Rialacha do phobal na scoile
Tá cosc iomlán ar chaitheamh tobac ar láthair na scoile, laistigh nó lasmuigh.
Ní mór do thuismitheoirí agus do dhaoine eile a thagann chuig an nGaelscoil cloí le Polasaí Tráchta na scoile. Tá tuismitheoirí/cúramóirí freagrach as sábháilteacht a bpáistí ar an mbealach chuig an scoil agus ar ais ón scoil.
Ní ról na dtuismitheoirí é daltaí a cheartú faoi aon imthosca. Má tá imní ar thuismitheoirí, ba chóir dóibh teagmháil a dhéanamh le ball den fhoireann teagaisc.
Iarrtar ar thuismitheoirí agus ar chuairteoirí eile ar an scoil an oiread Gaeilge agus is féidir a úsáid, mar go bhfuil sé seo an-chabhrach do na páistí.
Ní cheadaítear madraí ar thalamh Ghaelscoil Inse Chór, agus níor cheart iad a cheangal ar an ascaill.
Iarrtar ar thuismitheoirí fanacht taobh thiar den líne bhuí i gclós na scoile ar maidin. Iarraimid freisin ar thuismitheoirí an Gaeilge a úsáid i gclós na scoile ag gach deis agus chomh maith agus is féidir leo.
Ní mór do thuismitheoirí an campas a fhágáil díreach ar maidin agus ní mór dóibh filleadh ar an scoil ach amháin de réir coinne nó ag gnáthamanna bailithe. Baineann sé seo le gach gníomhaíocht scoile cibé acu a tharlaíonn siad ar an gcampas nó in áiteanna eile m.sh.: Lá Spóirt/Rámhaíocht/Snámh. Baineann sé seo le gníomhaíochtaí iarscoile freisin mura rud é go bhfuil comhaontú déanta roimhe sin.
Obair Bhaile
Bíonn an obair bhaile bunaithe i gcónaí ar an obair a dhéantar sa rang ar an lá céanna.
Is é cuspóir na hoibre baile scileanna scríbhneoireachta, cuimhne agus cruthaitheachta a fhorbairt.
Soláthraíonn an méid seo a leanas treoir maidir leis an tréimhse ama atá le caitheamh ar obair bhaile:
Naíonáin: suas le 15 nóiméad;
R1 & R2: 15 – 30 nóiméad;
R3 & R4: 30 – 45 nóiméad;
R5 & R6: suas le 1 uair an chloig.
I gcás nach ndéanann páiste obair bhaile, ní mór míniú i scríbhinn a thabhairt.
Straitéisí chun dea-iompar a chothú
NB: Cuireann Gaelscoil Inse Chór béim ar aitheantas, ceiliúradh agus luach saothair a thabhairt d’iompar maith chun bród a chothú sna páistí astu féin agus as an scoil. Seo a leanas cuid de na straitéisí a úsáidtear;
Moladh ón múinteoir/Príomhoide
Duaiseanna seachtainiúla, míosúla agus bliantúla chun dea-iompar a aithint agus a cheiliúradh.
Duaiseanna ranga ar nós obair bhaile saor in aisce nó turas ranga.
Duaiseanna a thugann aitheantas do láithreacht mhaith.
Duaiseanna a thugann aitheantas do rannpháirtíocht dhearfach na bpáistí sa teanga.
Straitéisí le haghaidh droch iompar
NB: Oibríonn an córas seo a leanas céim ar chéim. Réitítear an chuid is mó de na deacrachtaí ag an gcéad chéim, an dara céim nó an tríú céim.
A) Réasúnaíocht leis an leanbh.
B) I measc na smachtbhannaí chun a thaispeáint don leanbh nach bhfuil an t-iompar inghlactha tá:
scaradh sealadach ó dhaltaí eile;
obair bhreise;
tréimhse ama ag an ‘balla smaoinimh’ nó ‘balla machnaimh’ sa chlós;
pionós/smachtbhanna eile a mheastar a bheith oiriúnach.
Mínítear cásanna leanúnacha nó athchleachtacha i litir abhaile ón múinteoir, a chaithfidh an tuismitheoir/caomhnóir a shíniú.
C) Má leanann an drochiompar/má dhéantar é a athdhéanamh, cruinniú idir tuismitheoir agus múinteoir, áit a ndréachtaítear conradh iompair agus an leanbh i láthair. Beidh sé de chineál dearfach: aithneoidh an múinteoir imní agus iompar doghlactha; agus socróidh an múinteoir, na tuismitheoirí agus an leanbh spriocanna iompair inghlactha ansin.
D) Mura bhfuil an cás réitithe fós, nó má tá an drochiompar an-tromchúiseach ar an gcéad dul síos, cruinniú idir tuismitheoir/í agus Príomhoide na scoile. Féadfaidh Cathaoirleach an Bhoird Bainistíochta bualadh leis an tuismitheoir/na tuismitheoirí i gcásanna tromchúiseacha freisin, agus féadfaidh an Bord Bainistíochta litir a sheoladh chuig na tuismitheoirí.
E) I gcás drochiompair thromchúisigh, tá údarás tugtha ag an mBord don Phríomhoide aon ghníomh láithreach a dhéanamh is gá ar mhaithe le sábháilteacht/slándáil an linbh agus/nó daoine eile sa scoil. Tá údarás tugtha ag an mBord freisin don Phríomhoide agus do Chathaoirleach an Bhoird, ag gníomhú le chéile, an leanbh lena mbaineann a chur ar fionraí ón scoil ar feadh uastréimhse trí lá. Féadfar fionraí ón scoil a bhreithniú freisin i gcás drochiompair arís agus arís eile, easaontas agus/nó diúltú tuismitheoirí comhoibriú leis an scoil, i gcomhréir leis na céimeanna atá leagtha amach thuas, agus an fhadhb á déileáil. In aon chás fionraí, leantar na nósanna imeachta comhaontaithe atá molta ag Cumann Múinteoirí Éireann (CMU), agus i gcomhréir le Rialachán 130 (5) de na Rialacha do Scoileanna Náisiúnta. Beidh cóip de na nósanna imeachta seo ar fáil do thuismitheoirí i gcás den sórt sin.
F) I gcás aon fhadhbanna a leanann ar aghaidh, cuirfear an cás faoi bhráid na Roinne Oideachais agus/nó na nGardaí.
Cártaí Buí agus Dearga
Maidir le leanbh nach ndéanann a dhícheall an Gaeilge a labhairt, de réir a aoise agus a gcumas, cuirfear a ainm i leabhar a choimeádfaidh an múinteoir. Féadfar an leanbh a sheoladh chuig an ‘balla machnaimh’. Is limistéar sa chlós é seo inar féidir le páistí ‘sos ’ a ghlacadh. Ní fhéadfar é a úsáid ach amháin le linn am clóis nuair a bhíonn na páistí faoi mhaoirseacht. Le linn seo tugtar deis do na páistí machnamh a dhéanamh ar a n-iompar agus conas a d’fhéadfaí é a fheabhsú.
Tabharfar cárta buí don leanbh má chloistear easpa iarrachta leis an nGaeilge don dara huair. Seolfar litir abhaile chuig na tuismitheoirí chun é seo a chur in iúl dóibh, agus bainfear pribhléidí na ‘Tréimhse Órga’ den leanbh.
Tabharfar cárta dearg don leanbh má tharlaíonn sé an tríú huair, agus iarrtar ar an tuismitheoir/na tuismitheoirí freastal ar chruinniú leis an múinteoir ranga. Tá an leanbh i mbaol anois an deis a chailleadh páirt a ghlacadh i dturas ranga, mura dtagann feabhas ar bith air.
Má leanann an easpa iarrachta, iarrtar ar an tuismitheoir/na tuismitheoirí freastal ar chruinniú le Príomhoide na scoile. Cuirfear béim láidir anois ar an mbaol a bhaineann le gan dul ar thuras scoile.
Nasc le Polasaithe Eile
Tá tomhaiseanna áirithe sa pholasaí seo neartaithe arís sna polasaithe a leanas:-
- Polasaí Frith-Bhulaíochta
- Polasaí Tinrimh
- Polasaí um Chosaint Shonraí
- Polasaí Sláinte/Sábhaltachta
- Polasaí Cumarsáide
- Polasaí Úsáid Idirlín
An Bord Bainistíochta Gaelscoil Inse Chór Samhain 2018
